Von der Leyen: Rusia s’e respektoi armëpushimin asnjë minutë

Presidentja e Komisionit Evropian, Ursula von der Leyen, tha se Rusia nuk e respektoi armëpushimin energjetik të shpallur nga presidenti amerikan Donald Trump dhe se BE-ja duhet të shtojë presionin ndaj Moskës.

“Sigurisht, ne e mbështetëm armëpushimin energjetik të Presidentit Trump, por kemi parë që Rusia nuk e respektoi atë, asnjë minutë të vetme”, u tha ajo gazetarëve të premten, përpara ditës së dytë të samitit të BE-së në Bruksel. Sipas saj, Rusia e përshkallëzoi situatën.

Von der Leyen tha se BE-ja po punon për paketën e 22-të të sanksioneve kundër Rusisë. Ajo theksoi se blloku nuk do të heqë asnjë sanksion nëse Moska nuk i jep fund luftës.

Trump kishte deklaruar të dielën se Rusia dhe Ukraina kishin rënë dakord për ndalimin e menjëhershëm të sulmeve ndaj infrastrukturës energjetike të njëra-tjetrës.

Presidenti i Këshillit Evropian, Antonio Costa, mbështeti shtimin e presionit ndaj Rusisë dhe të ndihmës për Ukrainën, duke thënë se nuk është koha për lehtësimin e sanksioneve.

Sponsorët