Sadiku për Kurtin dhe Ramën: Fitoret nuk dëshmojnë qeverisje të suksesshme

Deputeti i LDK-së, Ermal Sadiku, vlerësoi se Albin Kurti dhe Edi Rama kanë dëshmuar aftësi për të fituar zgjedhje, por ende jo për të ndërtuar shtet, duke i akuzuar për përqendrim të pushtetit rreth vetes.

Në një postim në Facebook, Sadiku i përshkroi të dy si drejtues partish të majta me prirje autoritare. Sipas tij, në modelet e tyre të qeverisjes, institucionet, agjencitë dhe ndërmarrjet publike trajtohen si zgjatime të partisë, ndërsa besnikëria politike merr përparësi ndaj profesionalizmit.

“Fitorja në zgjedhje nuk është dëshmi e suksesit në qeverisje”, shkroi ai.

Sadiku kritikoi edhe angazhimin e tyre rajonal, duke pretenduar se ndërhyrjet në politikën e shqiptarëve në Maqedoninë e Veriut kanë kontribuar në përçarje. Ai i akuzoi gjithashtu se i përdorin shqiptarët e Luginës së Preshevës për propagandë politike.

Deputeti e lidhi kritikën me dallimin mes deklarimeve për teknologjinë e së ardhmes dhe problemeve të përditshme të qytetarëve. Sipas tij, furnizimi me ujë, arsimi, shëndetësia dhe shërbimet institucionale mbeten probleme të pazgjidhura në vendet që udhëheqin Kurti dhe Rama.

Sponsorët