Ramadani për hetimin e rastit Zekaj: Secili do të përgjigjet

Burim Ramadani, kryetar i komisionit hetimor parlamentar tashmë të konstituuar për rastin e Arlinda Zekajt, u zotua se secili do të përgjigjet për veprimet dhe mosveprimet institucionale, pavarësisht detyrës.

Komisioni do të hetojë veprimet dhe mosveprimet institucionale lidhur me vrasjen e Zekajt, si dhe trajtimin e dhunës ndaj fëmijëve dhe grave në familje. Ramadani tha se puna do të mbështetet në fakte, dokumente dhe dëshmi, me synimin për të përcaktuar përgjegjësitë konkrete.

“Pavarësisht detyrës, secili do të përgjigjet për veprimet dhe mosveprimet institucionale lidhur me vrasjen e Arlinda Zekajt dhe me trajtimin e dhunës ndaj fëmijëve dhe grave në familje”, deklaroi ai.

Sipas Ramadanit, hetimi synon të shkojë përtej ndriçimit të një rasti, duke shqyrtuar përgjegjësinë institucionale dhe funksionimin e shtetit. Ai e cilësoi rastin e Arlindës alarm serioz për institucionet dhe shoqërinë.

“Ky komision nuk është farsë, nuk do të bëjë raport politik, por raport të bazuar në fakte”, tha Ramadani, duke e paraqitur këtë si parimin mbi të cilin do të hartohet raporti përfundimtar.

Sponsorët