Marta Kos paralajmëron Serbinë: Glorifikimi i Mlladiqit nuk ka vend në BE

Komisionerja evropiane për Zgjerim, Marta Kos, ka paralajmëruar Serbinë se glorifikimi i Ratko Mlladiqit bie ndesh me vlerat themelore të Bashkimit Evropian.

Duke folur në Forumin Strategjik të Bledit, Kos tha se nderimi i një të dënuari për krime lufte nuk ka vend as në BE dhe as në shtetet që synojnë anëtarësimin në union.

Deklarata e saj erdhi pas raportimeve për planet që Mlladiqi të varroset me nderime të plota ushtarake dhe shtetërore. Ministri serb i Drejtësisë, Nenad Vujiç, kishte thënë se ai kishte të drejtë për nderime të tilla.

Kos tha se pret që Qeveria në Beograd të jetë e vetëdijshme për atë që është në rrezik dhe paralajmëroi se Komisioni Evropian do ta monitorojë situatën në Serbi. Sipas saj, zhvillimet do të merren parasysh në vlerësimin e rrugës evropiane të vendit.

Ratko Mlladiqi ishte komandant i Ushtrisë së serbëve të Bosnjës gjatë luftës së viteve 1992–1995. Ai u dënua me burgim të përjetshëm për gjenocid dhe krime kundër njerëzimit, ndërsa vendimi përfundimtar u la në fuqi në vitin 2021.

Burimet: Komisioni Evropian dhe Reporteri.