Kurti kërkon seancë pa tensione, akuzon kundërshtarët se synojnë zgjedhje të reja

Kryetari i Lëvizjes Vetëvendosje, Albin Kurti, ka deklaruar se seanca për konstituimin e Kuvendit duhet të thirret nga kryesuesi Avni Dehari dhe të zhvillohet pa incidente e tensione.

Kurti tha se Dehari synon ta thërrasë seancën për përmbylljen e procesit institucional, por kërkon që ajo të mbahet në rrethana të qeta dhe pa përpjekje për përshkallëzim politik.

Sipas tij, thirrja e seancës duhet të shërbejë për funksionalizimin e institucioneve dhe jo për krijimin e situatave të dhunshme ose tensionuese në Kuvend.

Kurti pretendoi se subjektet që kërkojnë konstituimin e shpejtë të Kuvendit, ndërsa nuk e mbështesin një zgjidhje për presidentin, nuk janë të interesuara realisht për përfundimin e procesit.

Ai tha se këto qëndrime mund të synojnë përsëritjen e zgjedhjeve, të cilat i cilësoi të panevojshme, dhe paralajmëroi edhe mundësinë e incidenteve.