Komisioni s’mbështet milionin për protezat, asnjë votë kundër

Komisioni për Buxhet, Punë dhe Transfere nuk e mbështeti amendamentin për ndarjen e 1 milion eurove për pajisje, proteza dhe mjete të tjera mjekësore për invalidët e luftës, pasi propozimi mori pesë vota për, asnjë kundër dhe pesë abstenime.

Amendamenti ishte propozuar nga komisioni parlamentar që mbulon mirëqenien sociale dhe vlerat e luftës, gjatë shqyrtimit të ndryshimeve në ndarjet buxhetore për vitin 2026.

Ministri i Financave, Hekuran Murati, tha se mbulimi i këtyre shpenzimeve është rregulluar me një udhëzim administrativ të marsit 2024, përmes Fondit të Sigurimeve Shëndetësore.

Kryetari i Komisionit për Buxhet, Enver Haliti, duke iu referuar informatave të Ministrisë së Shëndetësisë, tha se nga dy vendime të vitit 2024 për protezat kishin përfituar 103 persona: 58 invalidë të UÇK-së dhe 45 invalidë civilë të luftës. Sipas tij, kërkesat ishin zgjidhur, përveç një rasti ende në shqyrtim.

Deputeti i PDK-së, Mërgim Lushtaku, e mbështeti amendamentin, duke thënë se invalidët vazhdojnë të ankohen për mbulimin e shpenzimeve. Deputetja Teuta Haxhiu tha se disa prej tyre janë mbështetur te miqtë dhe diaspora për ndërrimin e protezave.

Deputeti i LDK-së, Avdullah Hoti, kërkoi zgjidhje të qëndrueshme përmes buxhetit të rregullt të Klinikës së Ortopedisë në QKUK, që kujdesi të mos varet nga vendime të veçanta qeveritare.

Sponsorët