Muharremi kundërshton kufizimin e Kuvendit pas vetos presidenciale

Eksperti ligjor Robert Muharremi vlerëson se Kuvendi mund ta ndryshojë një ligj të kthyer nga presidentja për rishqyrtim, nëse ndërhyrjet adresojnë arsyet e kthimit, duke kundërshtuar interpretimin se deputetët mund vetëm ta rikonfirmojnë ose ta rrëzojnë tekstin.

Në analizën e tij, Muharremi argumenton se ndalimi i korrigjimeve do ta zbrazte nga përmbajtja procesin e rishqyrtimit. Sipas tij, Kuvendi do të detyrohej ose ta rrëzonte një ligj për një problem të korrigjueshëm, ose ta miratonte sërish me të njëjtin problem.

Ai i referohet neneve 84 dhe 80 të Kushtetutës, që rregullojnë të drejtën e presidentit për kthimin e ligjeve dhe detyrimin për paraqitjen e arsyeve specifike.

Muharremi vlerëson gjithashtu se Aktgjykimi KO57/12 i Gjykatës Kushtetuese, i datës 20 shtator 2012, nuk vendos ndalim për ndryshime që adresojnë arsyet e kthimit. Sipas shpjegimit të tij, ai rast lidhej me propozimin e një neni të ri nga presidentja pa ndjekur procedurën e nismës legjislative.

Një argument tjetër lidhet me shqyrtimin në komisionin përgjegjës parlamentar. Sipas Muharremit, Rregullorja e Kuvendit nuk ia ndalon komisionit të rekomandojë amendamente të lidhura me vërejtjet presidenciale. Kërkesa për të paktën 61 vota, argumenton ai, përcakton shumicën për përmbysjen e vetos dhe nuk ndalon propozimin e ndryshimeve.

Sponsorët