Hochul i kërkon Trumpit ndalimin e operacioneve të ICE-së

Guvernatorja e New Yorkut, Kathy Hochul, tha se i ka kërkuar presidentit Donald Trump dhe sekretarit të Sigurisë Kombëtare, Markwayne Mullin, ndalimin e operacioneve të imigracionit në shtet, pasi një agjent federal plagosi me armë një shtetas dominikan gjatë një operacioni arrestimi.

Incidenti ndodhi të enjten pasdite në lagjen Marble Hill. Sipas autoriteteve lokale, burri ndodhej në një veturë me një fëmijë pesëvjeçar, i cili nuk u lëndua. I plagosuri mbijetoi dhe u dërgua në spital.

Kryetari i New Yorkut, Zohran Mamdani, i cilësoi të shtënat si një ngjarje “të papranueshme dhe jashtëzakonisht serioze” dhe tha se do t’i kërkonte Trumpit ndërprerjen e operacioneve të ICE-së në qytet.

Departamenti amerikan i Sigurisë Kombëtare konfirmoi se një agjent i ICE-së kishte qëlluar gjatë ndërhyrjes, të cilën e përshkroi si një “operacion të shënjestruar të zbatimit të ligjit”. Departamenti nuk dha një shpjegim të hollësishëm për rrethanat që çuan në përdorimin e armës.

DHS-ja fajësoi politikat lokale që kufizojnë bashkëpunimin me agjencitë federale të imigracionit, duke argumentuar se ato i detyrojnë agjentët të kryejnë arrestime në mjedise publike të paparashikueshme dhe të rrezikshme.

Pas incidentit, protestuesit u mblodhën në zonë dhe marshuan drejt spitalit ku po trajtohej i plagosuri, duke kërkuar largimin e ICE-së nga rrugët.

Sponsorët