Gruda: Kuvendi s’ka nevojë ta pyesë Specialen për ligjet

Deputeti i PDK-së, Përparim Gruda, tha se Kuvendi i Kosovës nuk ka nevojë ta konsultojë gjykatën për nismat ligjore dhe kundërshtoi vlerësimin e BE-së se ndryshimet për Dhomat e Specializuara shkelin detyrimet ndërkombëtare të Kosovës.

“Kuvendi i Kosovës nuk ka nevojë ta pyesë Gjykatën Speciale për nismat e veta ligjore”, deklaroi Gruda. Ai pohoi se ndryshimet e miratuara një ditë më parë nuk cenojnë detyrimet ndërkombëtare dhe se partneriteti me BE-në dhe rruga evropiane e Kosovës mbeten të padiskutueshme.

BE-ja kishte shprehur shqetësim të thellë për ndryshimet, ndërsa zëdhënësi i Dhomave të Specializuara, Michael Doyle, kishte thënë se gjykata nuk ishte konsultuar dhe mbetej e fokusuar në zbatimin e mandatit të saj.

Sipas Grudës, dilemat për kushtetutshmërinë e ligjit duhet t’i adresohen Gjykatës Kushtetuese të Kosovës në Prishtinë. Ai tha se amendamenti i miratuar qartëson kompetencat e saj dhe të Dhomës Kushtetuese në Hagë, duke pretenduar se kjo e fundit mund të kontrollojë aktet që dalin nga puna e Dhomave të Specializuara, por jo vendimet e Kuvendit të Kosovës.

Sponsorët