Fetahu: Si mund të votohet sot ligji për Specialen

Avokati i angazhuar nga PDK-ja, Faton Fetahu, thotë se projektligji për Dhomat e Specializuara mund të votohet në lexim të dytë sot, nëse Kuvendi miraton shmangien nga afatet procedurale dhe siguron kohë reale për shqyrtimin parlamentar.

Në një postim në Facebook, Fetahu kundërshtoi qëndrimin e kryeministrit Albin Kurti se duhet të kalojnë 72 orë nga leximi i parë. Sipas interpretimit të tij, ky afat buron nga neni 85 i Rregullores së Kuvendit, ndërsa neni 123 lejon shmangien nga afatet me propozimin e së paku gjashtë deputetëve dhe votën e dy të tretave të deputetëve të pranishëm.

Fetahu argumentoi se Gjykata Kushtetuese, në aktgjykimin e 9 janarit 2026, kishte kundërshtuar mënyrën e zbatimit të nenit 123 për ligjet e miratuara më 5 dhjetor 2024, sepse nuk ishte mundësuar shqyrtim real dhe efektiv. Sipas tij, Gjykata nuk kishte përjashtuar përdorimin e këtij neni.

Ai tha se materialet e projektligjit për Dhomat e Specializuara u ishin shpërndarë deputetëve më 3 tetor dhe se leximi i parë kishte përfunduar më 5 tetor. Fetahu e kushtëzoi procedimin sot me kohën e nevojshme për amendamente, shqyrtimin në komisione dhe përgatitjen e raportit për seancë.

“Projektligji mund të shqyrtohet në lexim të dytë edhe sot, nëse ekziston vullneti parlamentar për ta zbatuar nenin 123 në përputhje me standardin që ka përcaktuar Gjykata Kushtetuese”, shkroi ai.

Sponsorët