Durbin e Shaheen drejt Kosovës: Çfarë përfshin agjenda

Senatorët amerikanë Dick Durbin dhe Jeanne Shaheen do ta vizitojnë Kosovën në kuadër të një turneu ballkanik që, sipas njoftimit për vizitën, përfshin integrimin evropian, bashkëpunimin me NATO-n dhe diversifikimin e burimeve të energjisë.

Delegacioni ka përfunduar qëndrimin në Bosnjë e Hercegovinë dhe do të vizitojë edhe Shqipërinë, Malin e Zi e Kroacinë. Senatorët do të takohen me zyrtarë qeveritarë, diplomatë amerikanë, përfaqësues të shoqërisë civile dhe liderë të rinj. Në agjendë është edhe zbatimi i Aktit për Demokracinë dhe Prosperitetin e Ballkanit Perëndimor.

Kjo do të jetë vizita e fundit e Durbin në kuadër të një delegacioni kongresional si senator amerikan. Ai e kishte vizituar Ballkanin edhe në vitet 1999 dhe 2009.

“Vizita jonë do të dëshmojë interesimin e vazhdueshëm të SHBA-së për të parë përparim dhe vazhdim të pajtimit në rajon”, deklaroi Durbin.

Shaheen tha se takimet do të përqendrohen te siguria, mundësitë ekonomike dhe marrëdhëniet e vendeve të rajonit me Shtetet e Bashkuara.

Sponsorët