Trump propozon rezidencë presidenciale pranë klubit të tij privat

Përfaqësuesit e presidentit amerikan Donald Trump kanë propozuar ndërtimin e një rezidence zyrtare presidenciale pranë klubit të tij privat të golfit në West Palm Beach, me financim nga Trump dhe tokë që do t’i vihej në dispozicion qeverisë federale, sipas Washington Post. Ende nuk është arritur marrëveshje përfundimtare.

Avokati i klubit, Harvey Oyer, ka kërkuar që një pjesë e tokës në pronësi të Palm Beach County t’i kalojë qeverisë federale. Ai e ka paraqitur projektin si kontribut për presidentët e ardhshëm dhe banorët e zonës. Klubi ekzistues i golfit do të vazhdonte të funksiononte si pronë private e kompanisë së familjes Trump.

Sipas raportimit, autoritetet e Palm Beach County po shqyrtojnë propozimin dhe kanë nisur diskutime me Administratën e Shërbimeve të Përgjithshme të SHBA-së, e cila administron pronat federale.

Përfaqësuesit e Trumpit thonë se projekti nuk pritet të përfundojë gjatë mandatit të tij aktual. Rezidenca do të shërbente për presidentët e ardhshëm dhe pritjen e liderëve të huaj, ndërsa propozimi parashikon edhe mundësinë që ata të përdorin klubin e golfit.

Sponsorët