Tri shtete arabe krah Greqisë kundër marrëveshjes Turqi–Libi

Egjipti, Bahreini dhe Emiratet e Bashkuara Arabe iu bashkuan Greqisë në kundërshtimin e marrëveshjes detare Turqi–Libi, duke paralajmëruar në një deklaratë të përbashkët se ajo rrezikon sigurinë dhe stabilitetin rajonal.

Deklarata u dorëzua të hënën në Kombet e Bashkuara nga ministri i Jashtëm grek, George Gerapetritis. Katër shtetet argumentojnë se marrëveshja mund të krijojë precedent për marrëveshje dypalëshe arbitrare që minojnë rregullat e së drejtës ndërkombëtare.

Reagimi vjen pasi parlamenti lindor i Libisë miratoi javën e kaluar marrëveshjen për kufijtë detarë me Turqinë, të arritur fillimisht në vitin 2019. Greqia dhe Qiproja e kundërshtojnë atë, duke thënë se cenon pretendimet e tyre detare.

Presidenti turk, Recep Tayyip Erdogan, i hodhi poshtë të hënën kundërshtimet e Bashkimit Evropian dhe të aktorëve të tjerë, duke thënë se nuk kishin bazë legjitime.

Gerapetritis shprehu gatishmërinë e Athinës për të vazhduar përpjekjet për përcaktimin e zonave detare me Libinë. Ai u bëri thirrje autoriteteve libiane të ndërtojnë marrëdhënie të mira me fqinjët, në përputhje me rregullat detare.

Sponsorët