Stubb: Rusia nuk ka interes ta sfidojë NATO-n ushtarakisht
Presidenti finlandez Alexander Stubb thotë se nuk sheh prova që Rusia do të rrezikonte një sulm ndaj NATO-s, por kërkon vigjilencë të vazhdueshme.
Presidenti i Finlandës, Alexander Stubb, ka thënë se nuk beson që Rusia do të rrezikonte një sulm ndaj një vendi anëtar të NATO-s, duke vlerësuar se Moska nuk ka interes ta sfidojë ushtarakisht aleancën.
Në një intervistë për gazetën gjermane “Bild”, Stubb tha se nuk sheh prova apo fakte që mbështesin paralajmërimet se Rusia mund të jetë në gjendje të sulmojë territorin e NATO-s deri në vitin 2029.
Ai e përshkroi NATO-n si “aleancën më të fuqishme ushtarake në botë”, por theksoi se vendet anëtare duhet të mbeten vigjilente dhe të përgatiten për çdo skenar, në mënyrë që ta parandalojnë atë.
Sipas presidentit finlandez, fuqia e NATO-s në armë konvencionale, raketa dhe kapacitete bërthamore e bën një sulm të tillë të palogjikshëm. Ai tha se vlerësimi i tij mbështetet edhe në informacionet e inteligjencës.
Stubb argumentoi se Rusia po përpiqet të përhapë frikë në Evropë përmes luftës informative. Sipas të dhënave që ai paraqiti, humbjet mujore të forcave ruse në Ukrainë janë më të mëdha se numri i rekrutëve të rinj, duke e bërë të vështirë hapjen e një fronti të dytë.
Finlanda u anëtarësua në NATO në vitin 2023, pas pushtimit rus të Ukrainës. Stubb tha se mbështetja evropiane për Kievin mbetet jetike për sigurinë e kontinentit.