Specialja hap më shumë nga dëshmitë në gjykimin ndaj Thaçit

Dhomat e Specializuara të Kosovës kanë lejuar publikimin me më pak redaktime të transkripteve të dhjetë dëshmitarëve në gjykimin ndaj Hashim Thaçit, Kadri Veselit, Rexhep Selimit dhe Jakup Krasniqit, duke ruajtur masat për mbrojtjen e dëshmitarëve.

Sipas vendimit të publikuar më 26 tetor 2026, Trupi Gjykues II ka vlerësuar se pjesët për të cilat nuk nevojiten më redaktime mund të bëhen publike pa cenuar identitetin, privatësinë dhe sigurinë e personave të përfshirë.

Trupi gjykues miratoi redaktimet e propozuara nga Zyra e Prokurorit të Specializuar, me disa ndryshime. Disa kërkesa shtesë të Zyrës për Mbrojtjen dhe Mbështetjen e Dëshmitarëve u vlerësuan si të panevojshme, veçanërisht kur informacioni ishte bërë tashmë publik.

Prokuroria duhet t’ia dorëzojë Zyrës së Regjistrimit versionet me më pak redaktime. Kjo zyrë duhet të sigurojë zbatimin e redaktimeve përkatëse edhe në transkriptet shqip dhe serbisht, si dhe në incizimet audiovizuale, për aq sa është teknikisht e mundur.

Vendimi mundëson që më shumë përmbajtje e dëshmive të jetë e qasshme për publikun, ndërsa informacionet që kërkojnë mbrojtje mbeten të redaktuara.

Sponsorët