Shabani në Këshillin e Pavarur: Krenar që i përkas PDK-së

Anëtari i Këshillit të Pavarur Mbikëqyrës për Shërbimin Civil të Kosovës, Eshref Shabani, deklaroi në komisionin parlamentar se është krenar që i përket PDK-së, pasi deputeti i Vetëvendosjes, Alban Bajrami, e pyeti për përkatësinë partiake.

“E në cilën parti jam, jam shumë krenar që i përkas Partisë Demokratike të Kosovës”, tha Shabani. Ai theksoi se ishte zgjedhur nga Kuvendi me 55 vota dhe se vendimet e Këshillit mund të kontestohen në gjykatë.

Përplasja ndodhi gjatë raportimit për funksionimin e institucionit, kuorumin dhe shqyrtimin e ankesave të shërbyesve civilë. Deputetja e VV-së, Arbëreshë Kryeziu-Hyseni, kërkoi sqarime nëse Këshilli ka kuorum për mbledhje, caktim kolegjesh dhe trajtim ankesash. Kryesuesi Arben Mehmeti deklaroi gjatë diskutimit se mandati i tij kishte përfunduar më 25 janar 2025.

Deputeti i VV-së, Egzon Azemi, ngriti pretendimin për dallime në kohën e trajtimit të ankesave, duke përmendur pritje rreth 267 ditë në një rast dhe përgjigje brenda 45 ditësh në raste të tjera. Përfaqësuesit e Këshillit thanë se afatet varen nga natyra e lëndës.

Deputetja Albana Bytyqi shprehu shqetësimin për ndërhyrje politike, ndërsa Ganimete Musliu kritikoi mungesën e përcaktimit të temave dhe periudhës së raportimit në ftesën e komisionit.

Sponsorët