Pas anulimit nga protestat, çfarë ka në agjendë Kuvendi?

Kuvendi i Shqipërisë ka caktuar për 22 tetor, në orën 10:00, një seancë me interpelanca ministrore dhe shqyrtimin e propozimit për komisionin e reformës territoriale, sipas urdhrit të firmosur nga kryetari Niko Peleshi.

Seanca është njoftuar ndërsa protestat vijojnë në vend. Ajo e së enjtes së kaluar u anulua për shkak të protestave.

Sipas rendit të ditës, deputetët e opozitës kanë kërkuar interpelancë urgjente me ministrin e Brendshëm, Ervin Demo. Deputetët Ermal Pacaj dhe Tedi Blushi kanë kërkuar interpelanca me ministrin e Infrastrukturës dhe Energjisë, Enea Karakaçi, ndërsa Blushi ka kërkuar edhe interpelancë me ministrin e Financave, Petrit Malaj.

Në agjendë është përfshirë projektvendimi për ngritjen e Komisionit të Posaçëm Parlamentar për fazën e dytë të Reformës Administrativo-Territoriale. Ngritja e tij mbetet për shqyrtim në Kuvend.

Deputetët pritet të shqyrtojnë gjithashtu projektligje për shërbimet e pagesave, parandalimin e pastrimit të parave, të drejtat e autorit dhe treguesit gjeografikë për produktet artizanale dhe industriale.

Sponsorët