NYT: Marrëveshja miliardëshe e naftës hyn në bisedimet për Ukrainën

Bisedimet e administratës së Donald Trump me Rusinë për përfundimin e luftës në Ukrainë janë zgjeruar edhe me një marrëveshje nafte prej disa miliardë dollarësh, sipas New York Times. Gazeta raporton se marrëveshja do t’u sillte përfitime edhe grupeve të biznesit nga Lindja e Mesme me lidhje biznesi me familjen e Jared Kushner ose me Steve Witkoff, negociatorët amerikanë.

Sipas raportimit, marrëveshja përfshin asete të Lukoil dhe varet nga miratimi i qeverisë amerikane dhe Kremlinit. Në të përfshihen fusha nafte, rafineri dhe stacione benzine në vende të ndryshme të botës.

New York Times, duke cituar persona të njohur me takimin, shkruan se Vladimir Putin e ngriti këtë çështje më 5 shtator, gjatë bisedës me Witkoff dhe Kushner në Kremlin. Sipas njërit prej burimeve të gazetës, Putin e paraqiti përfundimin e marrëveshjes si mënyrë për t’u treguar rusëve se mund të bëjnë biznes me Shtetet e Bashkuara.

Në grupin që po ndjek marrëveshjen, sipas gazetës, përfshihen investitori amerikan Todd Boehly, dy grupe nga Lindja e Mesme dhe një degë e qeverisë amerikane. Shtëpia e Bardhë, Departamenti amerikan i Thesarit dhe Lukoil nuk iu përgjigjën kërkesave të gazetës për koment. Materiali nuk njofton se marrëveshja është miratuar.

Sponsorët