Kurti zbulon çfarë parashihet për pagat në buxhetin 2027

Projektbuxheti për vitin 2027 parasheh pagën e 13-të në gjysmën e parë të vitit dhe rritjen e koeficientit të pagave nga 110 në 120 euro nga 1 korriku, sipas kryeministrit Albin Kurti.

Gjatë mbledhjes së Qeverisë, Kurti tha se këto masa janë planifikuar për nëpunësit që paguhen nga buxheti i Kosovës. Ato u prezantuan si pjesë e projektbuxhetit, jo si pagesa tashmë të realizuara.

Sipas tij, buxheti për paga do të arrijë në 1 miliard e 85 milionë euro. Kurti tha se, për rreth 85 mijë punonjës publikë, kjo shumë përfaqëson një mesatare prej mbi 1 mijë eurosh bruto në muaj.

Projektbuxheti parasheh gjithashtu rritjen e shtesave për fëmijë nga 1 janari 2027. Sipas planit të prezantuar nga Kurti, shtesat do të rriten çdo vit me 25 për qind të shumës aktuale, në katër faza deri në vitin 2030, me synim dyfishimin e tyre.

Si shembull, ai tha se një familje me dy fëmijë, që aktualisht merr 60 euro në muaj, nga janari do të merrte 75 euro.

Vlera e përgjithshme e projektbuxhetit është paraparë në 4,27 miliardë euro, ndërsa 908 milionë euro janë planifikuar si financim i drejtpërdrejtë për komunat.

Sponsorët