Kurti mbështet ndryshimet për Specialen, por vë në dyshim dobinë

Kryeministri Albin Kurti tha sot në Kuvend se Vetëvendosje do t’i mbështeste në lexim të parë ndryshimet në ligjin për Specialen, megjithëse nuk ishte e bindur për dobinë e projektligjit.

“Ne nuk jemi të bindur për dobinë e këtij Projektligji. Na keni thënë që këtë e mbështesin edhe ekipet mbrojtëse, andaj po ua mbështesim edhe ne”, deklaroi Kurti, duke iu drejtuar PDK-së.

Ai i cilësoi lëvizjet për ndryshimin e ligjit si të ngutshme dhe të analizuara pamjaftueshëm. Sipas tij, koha për shqyrtim kishte qenë e shkurtër, sidomos në mungesë të aktgjykimit të prerë.

Kurti i kërkoi PDK-së të merrte përgjegjësinë dhe tha se pakënaqësia ndaj Gjykatës Speciale duhej t’u drejtohej atyre që kishin mbështetur themelimin e saj. Ai përmendi kundërshtimin e Vetëvendosjes ndaj krijimit të gjykatës dhe mungesën e konsultimit me këtë parti.

Sponsorët