Kosova nënshkruan marrëveshjen për t’iu bashkuar forcës ndërkombëtare në Gazë

Kosova ka nënshkruar marrëveshjen formale për përfshirjen e saj në Forcën Ndërkombëtare Stabilizuese për Gazën, sipas njoftimit të Bordit të Paqes.

Marrëveshja u nënshkrua në Prishtinë nga komandanti i Forcës së Sigurisë së Kosovës, gjenerallejtënant Bashkim Jashari, dhe komandanti amerikan i misionit ISF, gjeneralmajor Jasper Jeffers.

Bordi i Paqes tha se dokumenti e formalizon përfshirjen e Kosovës në këtë forcë dhe nënvizon mbështetjen e vendit për planin ndërkombëtar të paqes për Gazën.

Kosova kishte miratuar më herët dërgimin e një kontingjenti të FSK-së në këtë mision. Vendimi ishte miratuar nga Kuvendi dhe ishte autorizuar nga ushtruesja e detyrës së presidentes, Albulena Haxhiu, ndërsa një ekip vlerësues i FSK-së kishte udhëtuar në Gazë në prill.

Marrëveshja e re rregullon aspektin teknik të angazhimit të kontingjentit kosovar, por në njoftimet e deritanishme nuk është bërë e ditur data e vendosjes së trupave. Zbatimi i plotë i forcës ndërkombëtare vazhdon të varet nga kushtet politike dhe të sigurisë në terren.

Foto: Artinmaxharri19 / Wikimedia Commons, CC BY-SA 4.0.