Konjufca kundërshton UNMIK-un për përshkrimin e sulmit në Banjskë

Ministri i Jashtëm i Kosovës, Glauk Konjufca, kundërshtoi në Këshillin e Sigurimit të OKB-së përshkrimin e sulmit në Banjskë si “ngjarje e dhunshme” në raportin e UNMIK-ut, duke thënë se ai duhet të cilësohet sulm terrorist.

Konjufca deklaroi se sulmi i 24 shtatorit 2023 ishte organizuar dhe mbështetur nga Beogradi zyrtar përmes Milan Radoiçiqit. Ai e cilësoi raportin selektiv dhe pretendoi se një pjesë e rasteve të trajtuara në të mbështeten në propagandën serbe.

Sipas tij, dokumenti nuk pasqyron plotësisht përpjekjet e institucioneve të Kosovës për sundimin e ligjit, stabilitetin dhe lirinë e lëvizjes. Ai kundërshtoi edhe mënyrën se si raporti interpreton veprimet institucionale dhe përdor përkatësinë etnike.

Duke mbrojtur politikat e Qeverisë në veri, Konjufca tha se mbyllja e strukturave që i cilësoi ilegale synon siguri juridike dhe trajtim të drejtë për qytetarët. Ai përmendi bashkëpunimin e Policisë me KFOR-in dhe EULEX-in, si dhe hapjen e shërbimeve publike në komunat veriore, përfshirë kadastrin, pensionet dhe regjistrimin e bizneseve.

Sponsorët