Joseph propozon rrugën evropiane për shqetësimet mbi Specialen

Profesori amerikan Edward Joseph propozon që Kosova të negociojë me Bashkimin Evropian për shqetësimet lidhur me Gjykatën Speciale, duke synuar një marrëveshje që mund të përfshijë anëtarësimin në Këshillin e Evropës.

Në podcastin “PIKË”, gjatë bashkëbisedimit me Veton Surroin, ai vlerësoi se ekziston një përputhje interesash mes Kosovës, BE-së dhe administratës amerikane për arritjen e një mirëkuptimi të tillë.

Sipas Joseph, anëtarësimi në Këshillin e Evropës do t’i hapte Kosovës rrugën drejt Gjykatës Evropiane për të Drejtat e Njeriut, ku çështjet përkatëse mund të shqyrtoheshin brenda juridiksionit të saj. Këtë e paraqiti si mundësi për t’u negociuar, pa njoftuar ndonjë marrëveshje të arritur.

Ai theksoi se qasja e propozuar nuk nënkupton shpërfilljen e detyrimeve ndërkombëtare, por kërkimin e zgjidhjeve përmes dialogut me partnerët.

Joseph i cilësoi dënimet e Speciales si potencialisht disproporcionale, duke sqaruar se nuk mund të japë vlerësim përfundimtar pa shqyrtuar provat. Ai propozoi të diskutohen edhe kohëzgjatja e proceseve, shpenzimet e gjykatës dhe krahasimi i dënimeve me ato të Tribunalit të Hagës.

Sponsorët