Hoxha paralajmëron regjistër të emetimeve për 140 operatorë

Ministri i Mjedisit Jetësor dhe Planifikimit Hapësinor, Muamet Hoxha, prezantoi një nismë që parashikon regjistër digjital ku 140 operatorë me leje ekologjike të integruara të kategorisë A do të publikojnë të dhënat për emetimet, sipas kushteve të lejeve të tyre.

Në konferencën për media, Hoxha tha se moduli “AJRI” lidhet me Ligjin për Kontrollin e Emetimeve në Ajër, i cili hyn në fuqi në shtator 2027. Ai është njëri prej pesë moduleve të iniciativës “Kthesa e gjelbër përmes digjitalizimit”.

Moduli “THEMELET” parashikon qasje publike në vlerën, afatet, vendndodhjen dhe financimin e projekteve të ministrisë. Digjitalizimi i arkivit synon të mundësojë ndjekjen elektronike të lëndëve dhe identifikimin e nëpunësit përgjegjës, ndërsa digjitalizimi i sistemit të informacionit hapësinor, sipas prezantimit, ka përfunduar.

Në kuadër të thjeshtimit të procedurave administrative, 15 hapa parashikohen të realizohen deri në fund të vitit.

Një modul tjetër parashikon hartëzimin digjital të deponive ilegale. Platforma do t’u nënshtrohet konsultimeve me shoqërinë civile, BNJVL-në dhe ekspertët, ndërsa realizimi i saj është paraparë në buxhetin e vitit 2027. Sipas ministrisë, në disa komuna po zbatohet edhe një projekt pilot për mbikëqyrjen e deponive ilegale me kamera.

Sponsorët