Gjermania paralajmëron për përpjekje për delegjitimimin e zgjedhjeve në Bosnjë

Ministria e Jashtme gjermane ka paralajmëruar për përpjekje për delegjitimimin e zgjedhjeve në Bosnjë-Hercegovinë, në prag të votimit të përgjithshëm të planifikuar për të dielën. Në një përgjigje zyrtare ndaj një pyetjeje parlamentare, ajo shpreh shqetësim edhe për vënien në dyshim të teknologjive të reja zgjedhore.

Dokumenti, i nënshkruar më 1 tetor nga sekretari i shtetit Bernhard Kotsch, i përgjigjet pyetjes së deputetit të të Gjelbërve, Boris Mijatoviq. Sipas vlerësimeve të përfshira në të, rreziqet për procesin zgjedhor lidhen me përpjekjet e Rusisë për destabilizim, veprimet e nacionalistëve serbë dhe nxitjen e tensioneve etnike.

Ministria thekson se zgjedhjet e lira dhe të ndershme janë parakusht i rëndësishëm për përparimin e Bosnjë-Hercegovinës drejt Bashkimit Evropian. Ajo e vlerëson paketën për integritetin zgjedhor, të miratuar nga ish-përfaqësuesi i lartë ndërkombëtar Christian Schmidt, si bazë të rëndësishme për një proces më të lirë dhe më të ndershëm.

Gjermania ka angazhuar ekspertë civilë për monitorimin e zgjedhjeve. Berlini u bën thirrje aktorëve politikë vendas dhe ndërkombëtarë të respektojnë sovranitetin, integritetin territorial dhe pavarësinë e Bosnjë-Hercegovinës.

Sponsorët