Franca pezullon granatat në protesta pasi 15-vjeçari humbi dorën

Ministri i Brendshëm i Francës, Laurent Nuñez, njoftoi pezullimin e përdorimit të granatave trullosëse nga policia gjatë protestave të nxënësve, pasi një 15-vjeçar humbi dorën në Lens. Duke folur për radion RTL, ai tha se kishte kërkuar pezullimin derisa të sqarohen rrethanat e incidentit.

Autoritetet thonë se i riu e mori granatën në dorë para shpërthimit, ndërsa nxënës të tjerë pretendojnë se ai u godit drejtpërdrejt nga granata e hedhur nga një polic. Incidenti ndodhi pranë shkollës së mesme Auguste-Béhal. Versionet për mënyrën e plagosjes mbeten të kundërta.

Nuñez tha se Inspektorati i Përgjithshëm i Policisë Kombëtare ka hapur 18 hetime për të shqyrtuar proporcionalitetin e veprimeve policore gjatë protestave. Sipas Ministrisë së Arsimit, ndërprerjet e së mërkurës prekën 528 lice, ndërsa protestuesit kërkojnë përmirësimin e kushteve në shkolla.

Sponsorët