Clausen sjell satirën ndaj Trumpit në Parlamentin Evropian

Eurodeputeti danez Per Clausen ka sponsorizuar në Parlamentin Evropian në Strasburg një ekspozitë me një statujë satirike të Donald Trumpit, për të nxitur, sipas tij, debatin mbi pushtetin dhe marrëdhëniet e Evropës me SHBA-në. Miratimi i ekspozitës nuk përbën mbështetje të Parlamentit për mesazhin e saj.

Vepra e artistit danez Jens Galschiot, e titulluar “The Orange Plague”, e paraqet presidentin amerikan të zhveshur, të mbuluar me fletë ari dhe mbi shpatullat e një burri të dobët. Sipas artistit, skulptura kritikon mënyrën se si Trump ushtron pushtetin dhe politikat e tij ndaj mjedisit e rendit ndërkombëtar.

Clausen, anëtar i grupit të majtë në Parlamentin Evropian, tha se Evropa duhet të diskutojë si të jetë më e pavarur në politikat e saj. “Është shumë e rëndësishme që në Parlament të kemi mundësinë të tregojmë edhe gjëra me të cilat jo të gjithë janë dakord”, tha ai.

Parlamenti Evropian ka konfirmuar se ekspozita është miratuar nga kuestorët, eurodeputetët që merren me çështjet administrative të institucionit. Rregullat u lejojnë eurodeputetëve të sponsorizojnë ekspozita në hapësira të përcaktuara, por ky miratim nuk e bën mesazhin e veprës qëndrim zyrtar të institucionit.

Sponsorët