Cakolli: Çfarë ndodh nëse presidentja s’vendos për Ligjin për Specialen?

Ligji për Specialen konsiderohet i shpallur edhe pa dekret nëse presidentja nuk vendos deri më 23 tetor, ndërsa hyn në fuqi pas publikimit në Gazetën Zyrtare, sipas Eugen Cakollit, hulumtues në Institutin Demokratik të Kosovës (KDI).

Në reagimin e tij, Cakolli shpjegon se presidentja mund ta kthejë ligjin në Kuvend brenda tetë ditëve nga pranimi. Sipas tij, kthimi duhet të arsyetohet me kundërshtime konkrete që lidhen me dëmtimin eventual të interesave legjitime të Kosovës ose të komuniteteve.

Nëse ligji kthehet, Kuvendi mund ta miratojë sërish me së paku 61 vota. Cakolli thekson se me këtë votim përmbyset vetoja dhe presidentja nuk mund ta kthejë për herë të dytë të njëjtin ligj.

Ai vëren se Rregullorja aktuale e Kuvendit nuk e shtjellon procedurën e ndryshimit të dispozitave pas kthimit. Sipas interpretimit të tij, mundësia për korrigjime rrjedh nga vetë rishqyrtimi, por mbetet paqartësi procedurale.

Në rast kthimi, sipas Cakollit, Komisioni për Legjislacion ka katër javë nga pranimi për përgatitjen e raportit për seancë, me mundësi që shqyrtimin ta përfundojë më herët.

Sponsorët