Serwer kundërshton Vuçiqin pas fjalimit në OKB: Mlladiqi paguhej nga JNA-ja

Profesori amerikan Daniel Serwer kundërshtoi pretendimin e presidentit serb Aleksandar Vuçiq në Asamblenë e Përgjithshme të OKB-së se asnjë ushtar apo polic i Serbisë nuk kishte shkelur në territorin e ndonjë shteti tjetër. Në platformën e tij “Peacefare”, Serwer përmendi lidhjet financiare të ushtrisë jugosllave me oficerët serbë të Bosnjës.

“Vetë Mlladiqi ishte në listën e pagave të Ushtrisë Popullore Jugosllave (JNA), ashtu siç ishin edhe shumë oficerë të tjerë të Ushtrisë së serbëve të Bosnjës”, shkroi Serwer, duke e cilësuar deklaratën e Vuçiqit “një gënjeshtër të rëndë”.

Vuçiq e kishte paraqitur pretendimin gjatë diskutimit për bombardimet e NATO-s më 1999, duke thënë se vendimi për ndërhyrje ishte marrë megjithëse, sipas tij, forcat serbe nuk kishin hyrë në territorin e një shteti tjetër.

Ndaj fjalimit reagoi edhe analisti politik Jasmin Mujanoviq. Në një postim më 23 shtator, ai tha se fushata e forcave të Millosheviqit në Kosovë ishte lufta e katërt e tij në më pak se nëntë vjet. Sipas Mujanoviqit, gabimi i madh i NATO-s ishte që nuk kishte goditur drejtpërdrejt regjimin e Millosheviqit që në vitin 1991 ose 1992.

Sponsorët