Policia gjobit shoferin për vozitje të rrezikshme në Malishevë
Një shofer është gjobitur me 150 euro dhe një pikë negative pasi Policia e identifikoi nga një video e publikuar në rrjete sociale.
Policia e Kosovës ka identifikuar dhe ndëshkuar një shofer për vozitje të rrezikshme në Malishevë, pasi në rrjete sociale ishte publikuar një video e veprimit të tij në komunikacion.
Rasti kishte ndodhur më 27 gusht, rreth orës 21:50, në rrugën “Ibrahim Mazreku”.
Sipas njoftimit policor, shoferi kishte rritur vrullshëm shpejtësinë, duke shkaktuar rrëshqitjen dhe rrotullimin e gomave në vend, si dhe zhurmë të panevojshme.
Pas identifikimit të automjetit dhe drejtuesit, Policia i shqiptoi gjobë prej 150 eurosh dhe një pikë negative.
Drejtoria Rajonale e Policisë në Gjakovë ka paralajmëruar se do të vazhdojë të ndërmarrë masa ndaj pjesëmarrësve që rrezikojnë sigurinë në komunikacion.