Pesë aleatë evropianë duan barrë më të madhe në NATO

Franca, Gjermania, Italia, Polonia dhe Britania u zotuan të marrin përgjegjësi më të mëdha për sigurinë evropiane brenda NATO-s, duke theksuar se SHBA-ja mbetet aleat i domosdoshëm, sipas deklaratës së përbashkët pas takimit të së hënës në Paris.

Ministrat e Mbrojtjes të pesë vendeve, të njohura si grupi E5, thanë se kjo përpjekje do të zhvillohet në koordinim të ngushtë me Uashingtonin dhe aleatët e tjerë. Ata e cilësuan angazhimin e vazhdueshëm amerikan në sigurinë evropiane si thelbësor për një NATO të fortë dhe të besueshme.

Ministrja franceze Catherine Vautrin tha se vendet kishin rënë dakord të punonin për një Evropë më të fortë brenda aleancës, përmes një plani të koordinuar dhe me transparencë të plotë me SHBA-në.

Në takim mori pjesë edhe shefja e politikës së jashtme të BE-së, Kaja Kallas, e cila theksoi nevojën për modernizimin e forcave dhe aftësive mbrojtëse.

Ministrat riafirmuan mbështetjen për Ukrainën, por nuk njoftuan ndihmë të re financiare apo operacionale. Sipas Vautrin, takimi i ardhshëm i E5 do të mbahet në Romë në mars 2027.

Sponsorët