Kostovicova: Elitat përdorin nacionalizmin për të mbuluar dështimet në qeverisje

Denisa Kostovicova, profesoreshë në Shkollën Ekonomike të Londrës (LSE), vlerëson se elitat politike në shtetet e ish-Jugosllavisë përdorin narrativët nacionalistë për të zhvendosur vëmendjen nga korrupsioni dhe dështimet në qeverisje. Në një intervistë për emisionin “Uvid” të Shërbimit të Ballkanit të Radios Evropa e Lirë, ajo e lidhi këtë praktikë me pengesat për përballjen me të kaluarën.

“Ata u shërbejnë për ta zhvendosur vëmendjen dhe për të mbuluar problemet dhe dështimet në qeverisjen e shteteve”, tha Kostovicova për përdorimin e këtyre narrativëve nga elitat.

Duke komentuar protestat në Kosovë pas aktgjykimit të shkallës së parë ndaj ish-udhëheqësve të UÇK-së, ajo argumentoi se gjykimet për krime lufte janë të rëndësishme, por nuk mjaftojnë që shoqëritë të përballen me të kaluarën. Sipas saj, në rajon përsëritet modeli i mospranimit të krimeve të pjesëtarëve të grupit të vet dhe i njohjes vetëm të krimeve të palës kundërshtare.

Kostovicova përmendi dokumentimin e viktimave, përfshirë Librin e Kujtimit të Kosovës, si një rrugë plotësuese që nuk i përzgjedh viktimat sipas përkatësisë etnike. Ajo sugjeroi se debati për korrupsionin, keqqeverisjen dhe funksionimin e institucioneve mund të hapë hapësirë edhe për një diskutim më të lirë mbi të kaluarën.

Sponsorët