Kolshi: Kushtetuesja ndryshoi standardin për konstituimin e Kuvendit

Melos Kolshi, nga Instituti i Kosovës për Drejtësi, vlerësoi se vendimi i fundit i Gjykatës Kushtetuese për konstituimin e Kuvendit krijon paqartësi mbi kushtet që duhet të plotësohen për këtë proces. Në emisionin FIVE të Dukagjinit, ai tha se dispozitivi tregon një ndryshim të standardit të mëparshëm, por theksoi se arsyetimi i plotë ende nuk ishte publikuar.

Sipas Kolshit, dilema është nëse zgjedhja e pesë nënkryetarëve përbën kusht për konstituimin e Kuvendit apo detyrim që mund të përmbushet më pas. Ai tha se në aktgjykimet e vitit 2025 Gjykata e kishte lidhur konstituimin me zgjedhjen e kryetarit dhe të pesë nënkryetarëve, ndërsa në vendimin e fundit e konsideron Kuvendin të konstituuar dhe kërkon plotësimin e vendit të mbetur vakant.

“Kjo situatë e krijon një pasiguri juridike”, deklaroi Kolshi.

Në të njëjtin emision, drejtori i POLCON-it, Fitim Mulolli, kritikoi edhe trajtimin e tejkalimit të afatit 30-ditor për konstituimin. Sipas tij, Gjykata ka dhënë një zgjidhje për situatën aktuale, por ka krijuar paqartësi për zbatimin e standardeve kushtetuese në të ardhmen.

Vlerësimet e tyre u mbështetën në dispozitivin e publikuar; Kolshi nënvizoi se arsyetimi i plotë nevojitet për të kuptuar saktë qëndrimet e Gjykatës.

Sponsorët