Hargreaves uron Kurtin dhe kërkon bashkëpunim për Presidentin para 6 tetorit

Ambasadori britanik në Kosovë, Jonathan Hargreaves, u bëri thirrje partive politike të bashkëpunojnë për të zgjedhur një President para 6 tetorit. Në një postim në Facebook pas vendimit të Gjykatës Kushtetuese, ai uroi Albin Kurtin dhe ministrat për konfirmimin e tyre si Qeveria e re e Kosovës.

“Shpresoj që të gjitha partitë politike tani do të tregojnë një frymë përgjegjësie dhe bashkëpunimi duke punuar së bashku për të zgjedhur një President para 6 tetorit”, shkroi Hargreaves.

Ambasadori e vlerësoi konfirmimin e Qeverisë si një hap të rëndësishëm drejt institucioneve të qëndrueshme dhe efektive pas ngërçit të zgjatur politik. Ai shprehu gatishmërinë e Mbretërisë së Bashkuar për bashkëpunim të ngushtë me Qeverinë në muajt në vijim.

Hargreaves riafirmoi gjithashtu mbështetjen britanike për demokracinë, sundimin e ligjit, sigurinë rajonale dhe të ardhmen euroatlantike të Kosovës.

Sponsorët