Gjeneralmajori Roberto Vergori caktohet komandanti i ardhshëm i KFOR-it

Gjeneralmajori italian Roberto Vergori është caktuar si komandanti i ardhshëm i misionit të NATO-s në Kosovë, KFOR, ndërsa procesi i dorëzim-pranimit të detyrës ka hyrë në fazën përgatitore.

Komandanti aktual i KFOR-it, gjeneralmajor Özkan Ulutaş, ka pritur në Shtabin e KFOR-it në Camp Film City delegacionin e rotacionit të ardhshëm, të njohur si KFOR XXXI. Delegacioni është udhëhequr nga Vergori, pjesëtar i Ushtrisë Italiane.

Në program ka marrë pjesë edhe gjeneral brigade Onur Çakıcı nga Ushtria Turke, i cili është caktuar si zëvendëskomandanti i ardhshëm i misionit. Udhëheqja e re ka zhvilluar programin e trajnimit për drejtuesit kryesorë, i cili shërben për njohjen me stafin dhe procedurat operacionale të KFOR-it.

Sipas njoftimit të KFOR-it, trajnimi synon të sigurojë vazhdimësinë e komandimit, ruajtjen e gatishmërisë së lartë operacionale dhe një kuptim të përbashkët të misionit në të gjitha nivelet.

Ky program shënon zyrtarisht fillimin e procesit të transferimit të përgjegjësive nga udhëheqja aktuale tek ajo e ardhshme. Procesi pritet të përmbyllet me ceremoninë e transferimit të autoritetit gjatë vjeshtës.

Ulutaş ndodhet në mandatin e tij të dytë në krye të KFOR-it, të cilin e mori në tetor 2025 për një periudhë njëvjeçare. Vergori do ta marrë drejtimin në kuadër të rotacionit të radhës të komandës së misionit.

KFOR-i vazhdon të veprojë mbi bazën e Rezolutës 1244 të Këshillit të Sigurimit të OKB-së, me detyrën për të kontribuar në një mjedis të sigurt dhe liri të lëvizjes për të gjitha komunitetet në Kosovë. Misioni bashkërendon veprimet me Policinë e Kosovës dhe EULEX-in, sipas përgjegjësive përkatëse të sigurisë.

Shënim redaksional: Imazhi kryesor i këtij artikulli është krijuar me inteligjencë artificiale dhe është përdorur vetëm si ilustrim simbolik.

Burimet:
Telegrafi
Anadolu Agency
Kontakt Plus