Gjashtë vjet burg për tentim-shitjen e pronës së menaxhuar nga AKP-ja me dokumente të falsifikuara

Gjykata Themelore në Prishtinë e ka shpallur fajtor të akuzuarin me inicialet Sh.B. për falsifikim dokumentesh dhe mashtrim, duke i shqiptuar dënim unik prej gjashtë vjetësh burg dhe gjobë prej 2 mijë eurosh.

Sipas njoftimit të gjykatës, rasti lidhet me tentimin për t’ia shitur një personi një pronë në Prishtinë për 800 mijë euro. Prona ishte nën menaxhimin e Agjencisë Kosovare të Privatizimit, ndërsa autorizimi i paraqitur në emër të të akuzuarit rezultoi i falsifikuar pas verifikimit nga noterja.

Gjykata tha se veprimi kishte mbetur në tentativë. Krahas dënimit me burg dhe gjobës, Sh.B. është obliguar të paguajë 200 euro shpenzime gjyqësore dhe 20 euro për Programin për Kompensimin e Viktimave të Krimit.

Aktgjykimi urdhëron edhe konfiskimin e përhershëm të dokumentit të falsifikuar. I dëmtuari është udhëzuar që kërkesën pasurore-juridike ta realizojë në procedurë të rregullt civile.

I akuzuari do të mbrohet në liri deri në plotfuqishmërinë e aktgjykimit. Palët kanë të drejtë ankese në Gjykatën e Apelit brenda 30 ditësh nga pranimi i vendimit, prandaj aktgjykimi nuk është përfundimtar.