Gara: Tri identifikime nga varrezat masive në Zubin Potok

Kushtrim Gara, nga Komisioni Qeveritar për Personat e Zhdukur, konfirmoi se janë pranuar tri raportet e para të ADN-së për mbetjet mortore të zhvarrosura në Kalludër dhe Jabukë të Zubin Potokut. Në deklaratën e përcjellë nga RTK-ja, ai tha se ekspertët po punojnë për përshpejtimin e procedurave për mostrat e tjera.

Mbetjet mortore dyshohet se u përkasin civilëve të grupit të njohur si “Grupi i Intelektualëve të Mitrovicës”, të vrarë gjatë luftës në Kosovë. Sipas Garës, ekspertët mjekoligjorë janë në komunikim të vazhdueshëm me homologët e Komisionit Ndërkombëtar për raportet që ende priten.

Gara theksoi se familjarët do të njoftohen të parët sapo të pranohen rezultatet, siç është vepruar me tri identifikimet e para. Ai e cilësoi zbardhjen e fatit të të zhdukurve dhe vënien e përgjegjësve para drejtësisë detyrim të pandërprerë institucional ndaj viktimave dhe familjeve të tyre.

Sponsorët