Xhelal Sveçla dënohet me një vit burgim me kusht për gazin lotsjellës në Kuvend

Gjykata Themelore në Prishtinë e ka dënuar ministrin në detyrë të Punëve të Brendshme, Xhelal Sveçla, me një vit burgim me kusht për hedhjen e gazit lotsjellës në Kuvend më 21 mars 2018.

Aktgjykimi u shpall të martën nga gjykatësi Sabit Sadikaj. Sipas vendimit, dënimi nuk do të ekzekutohet nëse Sveçla nuk kryen vepër tjetër penale gjatë periudhës verifikuese njëvjeçare.

Prokurori Valdrin Krasniqi kishte kërkuar dy vjet burgim dhe gjobë prej 3 mijë eurosh.

Sveçla mungoi në shpalljen e dënimit.

Më 2 shtator, Gjykata e kishte shpallur fajtor për veprën penale “Përdorimi i armës apo mjetit të rrezikshëm”, duke e rikualifikuar veprën nga paragrafi 2 në paragrafin 1.

Foto: Kuvendi i Republikës së Kosovës / Wikimedia Commons, domen publik.

DPT — Drita për të vërtetën