Rusia kërcënon me armë bërthamore nëse NATO-ja izolon Kaliningradin

Rusia ka paralajmëruar se është e gatshme të përdorë edhe armë bërthamore nëse vendet e NATO-s përpiqen ta izolojnë Kaliningradin nga pjesa tjetër e vendit. Paralajmërimi gjendet në një notë diplomatike dërguar aleancës, të parë nga agjencia Reuters.

NATO-ja, në një përgjigje me shkrim të parë gjithashtu nga Reuters, kundërshton pretendimin për kërcënim ndaj territorit rus. Aleanca thotë se ka karakter mbrojtës dhe se asnjë nga stërvitjet apo aktivitetet e saj nuk kërcënon territorin e Federatës Ruse.

Në dokument, Moska e akuzon NATO-n për një kurs që, sipas saj, rrit rrezikun e konfliktit të drejtpërdrejtë të armatosur. Nota përmend edhe mundësinë e goditjeve ruse ndaj qendrave vendimmarrëse në shtetet anëtare të aleancës që në fazat e para të një konflikti.

Kaliningradi është një eksklavë ruse në Detin Baltik, mes Polonisë dhe Lituanisë. Kërcënimi rus për përdorimin e arsenalit bërthamor lidhet në dokument me një përpjekje të mundshme për izolimin e këtij territori.

Në përgjigjen e saj, NATO-ja i kërkon Rusisë t’i japë fund pushtimit të Ukrainës dhe të ndalojë retorikën bërthamore, të cilën e cilëson të papërgjegjshme.

Sponsorët