Norvegjia thërret 11 ministra e ish-ministra për lidhjet me Epstein

Parlamenti i Norvegjisë ka nisur seancat dëgjimore për lidhjet e politikanëve dhe diplomatëve norvegjezë me financierin e dënuar për abuzime seksuale Jeffrey Epstein. Komisioni parlamentar ka thirrur për të dëshmuar 11 ministra aktualë dhe ish-ministra të jashtëm e të zhvillimit, përfshirë kryeministrin Jonas Gahr Støre.

Støre, i cili drejtoi Ministrinë e Jashtme nga viti 2005 deri më 2012, ka deklaruar se nuk ka pasur lidhje me Epstein. Thirrja për dëshmi është pjesë e shqyrtimit parlamentar të marrëdhënieve dhe përgjegjësive në shërbimin diplomatik.

Kryetari i Komitetit të Auditimit dhe Çështjeve Kushtetuese, Jonas Andersen Sayed, tha se qeveria duhet të shpjegojë masat për rikthimin e besimit te diplomacia. “Ka shumë njerëz që kanë treguar gjykim të dobët”, deklaroi ai për personat që kishin miqësi me Epstein.

Mes të thirrurve është edhe ish-ministri i Jashtëm Berge Brende, i cili dha dorëheqjen nga drejtimi i Forumit Ekonomik Botëror pas zbulimeve për marrëdhënien me Epstein. Brende ka thënë se nuk e njihte të kaluarën kriminale të financierit kur u takuan për herë të parë në vitin 2018 dhe se pendohet që nuk bëri më shumë verifikime.

Ish-ministri i Zhvillimit Erik Solheim, gjithashtu i thirrur për dëshmi, e ka kritikuar hetimin si reagim të tepruar që mund të ndikojë në funksionimin e shërbimit diplomatik.

Paralelisht me seancat, parlamenti ka ngritur një komitet të jashtëm me ekspertë akademikë dhe ligjorë për të shqyrtuar çështjet e dala nga dokumentet e Epstein dhe për të propozuar masa për integritetin e transparencën e autoriteteve. Hetimi pritet të mbulojë mbi 30 vite të historisë diplomatike norvegjeze dhe të përfundojë me raport në fillim të vitit 2028.

Sponsorët