Ministri belg paralajmëron një “dimër të errët” nga kërcënimet ruse

Ministri belg i Mbrojtjes, Theo Francken, paralajmëroi se Evropa mund të përballet me më shumë veprime hibride ruse në muajt e ardhshëm. Në një intervistë për Euronews në Bruksel, të mërkurën, ai kërkoi përshpejtimin e prodhimit ushtarak dhe forcimin e mbrojtjes ajrore.

“Do të ketë më shumë veprime që përbëjnë kërcënime hibride në muajt e ardhshëm. Do të jetë një dimër i errët për Evropën”, tha Francken.

Ministri e cilësoi Rusinë si kërcënimin më të madh për sigurinë e Belgjikës. Sipas tij, Evropës i duhet edhe teknologjia ukrainase për t’iu kundërvënë dronëve rusë me motorë reaktivë.

Francken theksoi se blerjet duhet të përshtaten me ndryshimet e shpejta teknologjike. Ai tha se nuk dëshiron të grumbullojë 200 mijë dronë që mund të vjetërohen brenda pak muajsh.

Sipas ministrit, Belgjika i ka dyfishuar shpenzimet për mbrojtjen nga niveli prej 1% të PBB-së. Megjithatë, ai e vlerësoi si jorealist arritjen e nivelit prej 5% në një të ardhme të afërt, duke përmendur vështirësitë buxhetore të vendit.

Sponsorët