KOMANDANT REMI Rrustem Mustafa jep sinjale…
Rrustem Mustafa beson se ligji për Dhomat e Specializuara mund të procedohet para 6 tetorit dhe thotë se Kurti ka dhënë sinjale pozitive.
Deputeti i PDK-së, Rrustem Mustafa, i njohur si Komandant Remi, beson se procedimi i ligjit për Dhomat e Specializuara mund të përfundojë edhe para 6 tetorit. Ai tha se ka marrë sinjale pozitive nga kryeministri Albin Kurti për këtë çështje.
Sipas Mustafës, ligji për të cilin është arritur marrëveshje ndodhet tashmë në Qeveri dhe duhet të vazhdojë procedimi i tij. Ai u shpreh se realizimi i këtij hapi para datës 6 është i mundur, duke iu referuar edhe qëndrimit të kryeministrit.
Mustafa tregoi gjithashtu se kishte komunikuar me Kurtin para 16 shtatorit. Ai e përshkroi bisedën si të mirë dhe tha se temë e saj ishte bashkëpunimi institucional ndërmjet PDK-së dhe Vetëvendosjes.
Deputeti vlerësoi se ka hapësirë për këtë bashkëpunim. Sipas tij, miratimi i deklaratës së përbashkët lidhur me aktgjykimin dënues në Hagë është një arsye për shpresë.