Koci: Abdixhiku duhej t’i konsultonte deputetët para marrëveshjes me Kurtin
Milazim Koci kritikoi mënyrën si Lumir Abdixhiku komunikoi me deputetët e LDK-së pas bisedimeve me Albin Kurtin.
Politologu Milazim Koci ka thënë se kundërshtimi i gjashtë deputetëve të LDK-së ndaj marrëveshjes me Lëvizjen Vetëvendosje nuk ishte një zhvillim i papritur.
Ai kritikoi mënyrën se si kryetari i LDK-së, Lumir Abdixhiku, e menaxhoi komunikimin me Grupin Parlamentar pas bisedimeve me Albin Kurtin.
Sipas Kocit, Abdixhiku duhej të takohej fillimisht me deputetët dhe të përpiqej t’i bindte ata për mbështetjen e kandidaturës së Bekim Sejdiut për president.
Koci vlerësoi se konferenca publike e Abdixhikut e vendosi grupin parlamentar para një vendimi të kryer dhe u perceptua si ultimatum.
Ai tha se deputetëve duhej t’u jepej më shumë kohë për diskutim dhe për sigurimin e votave, duke shtuar se u krijua përshtypja se nuk pati përpjekje të mjaftueshme për t’i bindur kundërshtarët e kandidaturës.