Irani propozon rihapjen e Hormuzit, pret përgjigjen e SHBA-së

Irani po pret përgjigjen zyrtare të SHBA-së për një propozim që parashikon rihapjen e Ngushticës së Hormuzit dhe ndaljen e luftimeve në rajon. Ministri i Jashtëm iranian, Abbas Araqchi, tha se arritja e një marrëveshjeje do të niste një afat shtatëditor për zbatimin e këtyre hapave.

Sipas zyrtarëve iranianë, propozimi u paraqit gjatë Asamblesë së Përgjithshme të OKB-së në Nju Jork dhe iu përcoll Uashingtonit përmes Katarit. “Nëse nga pala amerikane ka seriozitet për arritjen e një marrëveshjeje dhe rihapjen e Ngushticës së Hormuzit, gjithçka tashmë është gati”, tha Araqchi.

Plani iranian parashikon ndaljen e luftimeve në të gjitha frontet, përfshirë Libanin. Në këmbim, Teherani kërkon heqjen e bllokadës amerikane ndaj porteve iraniane, lirimin e fondeve të ngrira dhe heqjen e sanksioneve ndaj naftës.

Araqchi tha se pranimi i propozimit nga SHBA-ja mund t’u hapte rrugë bisedimeve më të gjera për çështje të dakordësuara nga palët, përfshirë potencialisht programin bërthamor iranian.

Sponsorët