Instituti për Bashkitë: Buxheti nuk pasqyron kostot e reformës
Instituti për Bashkitë e Shqipërisë vlerëson se projektbuxheti vendor për vitin 2027 nuk pasqyron mjaftueshëm kostot e reformës territoriale, e cila, sipas dokumentit të tij, parashikon kalimin nga 61 në…

Instituti për Bashkitë e Shqipërisë vlerëson se projektbuxheti vendor për vitin 2027 nuk pasqyron mjaftueshëm kostot e reformës territoriale, e cila, sipas dokumentit të tij, parashikon kalimin nga 61 në 46 bashki.
Në rekomandimet drejtuar Komisionit për Ekonominë, Punësimin dhe Financat në Kuvend, Instituti kërkon financim të posaçëm për tranzicionin. Sipas tij, krahas mbulimit të funksioneve të bashkive ekzistuese, duhen llogaritur shpenzimet e riorganizimit, detyrimet që do të trashëgohen dhe kursimet e pritshme.
Instituti kërkon publikimin e një simulimi të shpërndarjes së fondeve për 46 bashkitë e parashikuara, për të treguar cilat do të përfitonin dhe cilat mund të humbnin financim. Formula aktuale, sipas analizës, mbështetet ende te 61 bashkitë.
Një tjetër rekomandim është hartimi i një Plani Financiar të Tranzicionit për vitet 2027–2029, që të përfshijë asetet, kontratat, personelin, projektet në vazhdim dhe burimet për kostot e njëhershme.
Instituti vlerëson rritjen e financimit vendor, por argumenton se ajo nuk garanton automatikisht më shumë autonomi apo shërbime më të mira. Ai kërkon gjithashtu raportim gjatë vitit 2027 mbi shpenzimet, kursimet dhe cilësinë e shërbimeve publike.
Sponsorët
![]() | ![]() | ![]() |


