Hamza: Beteja në Hagë s’mund të mbetet vetëm te familjet

Kryetari i PDK-së, Bedri Hamza, tha se shteti duhet t’i mbështesë ish-krerët e UÇK-së në procesin në Hagë me të gjitha kapacitetet dhe përgjegjësitë e tij, pasi kjo barrë nuk mund të bartet më vetëm nga individët, familjet dhe mbrojtësit e tyre.

“Beteja për drejtësi në Hagë nuk mund të bëhet më vetëm nga individët, familjet, dashamirët dhe mbrojtësit e tyre, të cilët tash e gati gjashtë vjet po e bartin mbi supet e tyre peshën e rëndë të këtij procesi. Shteti ynë tani duhet të jetë pranë tyre, me të gjitha kapacitetet dhe përgjegjësitë që i takojnë”, ka shkruar Hamza.

Pas zgjedhjes së Justina Shiroka-Pulës presidente, ai shprehu besimin se do të ketë angazhim më të madh shtetëror për ish-udhëheqësit e UÇK-së. Hamza e lidhi pritjen për bashkëpunim me deklaratën e përbashkët në Kuvend, ligjin që e përshkroi si ligj për mbrojtjen e UÇK-së dhe zgjedhjen e presidentes.

Ai falënderoi qytetarët që kanë protestuar në Prishtinë, në qytete të tjera të Kosovës dhe në diasporë, duke bërë thirrje për koordinim dhe veprime konkrete në mbështetje të kësaj kauze.

Sponsorët