Gruda: Mbeten 13 ditë për zgjedhjen e Presidentit dhe shmangien e zgjedhjeve

Deputeti i PDK-së, Përparim Gruda, deklaroi se kanë mbetur vetëm 13 ditë për zgjedhjen e Presidentit të Kosovës, miratimin e ndryshimeve në ligjin për Dhomat e Specializuara dhe shmangien e zgjedhjeve të reja. Ai reagoi pas vendimit të sotëm të Gjykatës Kushtetuese mbi kërkesën e PDK-së për vlerësimin e kushtetutshmërisë së Kuvendit dhe Qeverisë.

Sipas Grudës, afati kushtetues për zgjedhjen e Presidentit ka nisur më 8 gusht dhe përfundon më 6 tetor. Ai e interpretoi vendimin si konfirmim të qëndrimeve të PDK-së dhe tha se moskonstituimi i Kuvendit brenda afatit 30-ditor përbënte shkelje kushtetuese.

Deputeti kërkoi gjithashtu zgjedhjen e nënkryetarit të Kuvendit nga PDK-ja, duke theksuar se kjo pozitë nuk mund të mbetet peng i vullnetit të shumicës parlamentare.

“Koha është e kufizuar dhe përgjegjësia tashmë është e qartë”, tha Gruda. Në reagimin e tij, ai argumentoi se afatet kushtetuese nuk mund të përshtaten sipas interesave politike të momentit.

Sponsorët