Deliu-Kodra i kërkon Deharit ta thërrasë seancën: Nuk ka më kohë për të pritur
Blerta Deliu-Kodra i kërkoi Avni Deharit ta thërrasë seancën konstituive dhe tha se pritja për krijimin e institucioneve nuk mund të vazhdojë më.
Deputetja e Partisë Demokratike të Kosovës, Blerta Deliu-Kodra, i ka kërkuar kryesuesit të seancës konstituive, Avni Dehari, ta thërrasë mbledhjen e Kuvendit dhe t’i hapë rrugë krijimit të institucioneve të reja.
Gjatë një aksioni të PDK-së dhe AAK-së para ndërtesës së Qeverisë, ajo tha se Kosova po kalon ditë të rënda pa institucione dhe se pritja nuk mund të vazhdojë më.
Deliu-Kodra deklaroi se mbrëmjen e kaluar u pa se nuk ka marrëveshje politike, ndërsa i kërkoi Albin Kurtit të kthehet në Kuvend dhe ta ndalë, siç u shpreh ajo, bllokadën politike.
Sipas deputetes së PDK-së, vendi ka tejkaluar afatet kushtetuese dhe ligjore, ndërsa mungesa e institucioneve po e pengon funksionimin normal të shtetit.
Ajo tha se pas konstituimit të Kuvendit mund të vazhdohet me procedurat e tjera institucionale, përfshirë zgjedhjen e presidentit, nëse ekzistojnë votat e nevojshme.
Në të njëjtin aksion morën pjesë edhe deputetë, asamblistë dhe aktivistë të PDK-së e AAK-së, të cilët kërkuan përfundimin e bllokadës institucionale.