Aktakuza e dytë ndaj Thaçit: Dy orë për fjalën finale, seancat nisin më 10 shtator

Mbrojtja e Hashim Thaçit do të ketë dy orë për deklaratën përmbyllëse në çështjen e veçantë gjyqësore që lidhet me pretendime për ndërhyrje në drejtësi.

Sipas njoftimit të Dhomave të Specializuara, deklaratat përmbyllëse janë caktuar për 10, 11 dhe 14 shtator 2026, ndërsa seancat do të nisin në orën 09:30 dhe mund të zgjasin deri në 17:15.

Zyra e Prokurorit të Specializuar do të ketë tri orë për fjalën finale dhe një orë për kundërpërgjigje. Mbrojtja e Thaçit do të ketë 30 minuta për përgjigje, ndërsa ekipet e të akuzuarve të tjerë nga 15 minuta secili.

Në këtë çështje akuzohen Hashim Thaçi, Bashkim Smakaj, Isni Kilaj, Fadil Fazliu dhe Hajredin Kuçi. Të gjithë janë deklaruar të pafajshëm për akuzat.

Ky proces është i ndarë nga gjykimi për krime lufte ndaj Thaçit, Kadri Veselit, Rexhep Selimit dhe Jakup Krasniqit, aktgjykimi i të cilit është paralajmëruar për 16 shtator.

Foto: Presidenca e Kosovës / Wikimedia Commons, domen publik.

DPT — Drita për të vërtetën