Përfaqësuesit e studentëve protestojnë para Zyrës së BE-së për procesin ndaj ish-krerëve të UÇK-së

Përfaqësues të parlamenteve studentore të universiteteve publike në Kosovë kanë protestuar para Zyrës së Bashkimit Evropian në Prishtinë, duke shprehur pakënaqësinë e tyre me procesin gjyqësor ndaj ish-krerëve të Ushtrisë Çlirimtare të Kosovës në Hagë.

Organizatorët thanë se përfaqësojnë mbi 100 mijë studentë dhe se nismës i janë bashkuar edhe përfaqësues studentorë nga Shqipëria dhe Maqedonia e Veriut. Ata i dorëzuan Zyrës së BE-së një deklaratë të përbashkët me kërkesat e tyre.

Në deklaratë kërkohet që vendimi ndaj Hashim Thaçit, Kadri Veselit, Jakup Krasniqit dhe Rexhep Selimit të merret pa ndikime politike e pa standarde të dyfishta dhe të mbështetet vetëm në fakte, prova, ligj dhe Kushtetutën e Kosovës.

Përfaqësuesit studentorë pretenduan se mënyra e zhvillimit të procesit ka krijuar perceptimin se po favorizohet narrativa politike e Serbisë. Ata kërkuan transparencë, paanshmëri, trajtim të barabartë dhe respektim të të drejtave themelore të të akuzuarve.

Studentët thanë se nuk do të pranojnë që lufta e UÇK-së të paraqitet si një narrativë kriminalizuese dhe kërkuan që shqetësimet e tyre të merren seriozisht nga institucionet evropiane. Në fund të deklaratës, ata shprehën pritjen që ish-udhëheqësit e UÇK-së të lirohen dhe të kthehen në Kosovë më 16 shtator.